|
|
тянкам яко годовщина так и навезка совито маеть быти сказывана, так же и везеньем совитым карано, тымже обычаем духовным особам всякого на-боженства хрестиянского и их жонам и детям их которые з венъчальных жон походять маеть быти головщизна навезка и нагорода за охроменье на члонъках, так яко и людем народу шляхетъского. А тое везенье в сем аръ-тыкуле на винъных описаное маеть быти выконывано заразом скоро по сказанью врядовом. Пакли ж бы што с тых речей веръху менованых один другому учынил не умыслне, не обычаем окрутеньства, але в зваде с припадку и в том бы с права винным был найден, тогды таковый и за вътятье або выбитье члонку каранья на теле своем относити не будет, але только виною пенежною и везеньем таким яко вышей описано каран быти маеть. Арт. 39. О каранъю людей стану простого за забытье шляхътича. К тому уставуем естли бы люди простого будь стану наши господарские або князъские панские земянские бояре панцерные путные мещане або люди тяглые забили шляхътича або шляхътянку, тогды колко их будеть через сторону жалобную перед правом обвинено и поступком правным... того на них доведено, мають вси горлом карани быти. А вед же и таких людей простых вышей трех чоловеков за одну голову шляхетскую карано быти не маеть. А то ся маеть розумети о забийстве в зваде учиненом, а где бы люди простого стану умысльне кгвалътом на дом альбо на господу шляхе-тъскую нашодши або на дорозе умысльне заступившы шляхътича забили, таковые за доводом слушным тые вси на которых сторона поприсягнеть горлом караны быти мають а где бы хто с тых станов простых верху менованых шляхътича або шляхътынку збил, зранил, таковый утятьем руки каран быти маеть, а естли бы руку ногу утял, або на яком ином члонку охро-мил за то маеть горлом каран быти.
РОЗДЕЛ ДВАНАДЦАТЫЙ
О головщинах и о навезках людей простых и о таких
людех и челяди, которая от панов своих отъходить;
также и о слугах приказных
Арт. 1. О забытью человека простого стану от шляхтыча. Повсте-гаючи мы господар своволенства изуфальства людские которые ся што от часу в людех неповтегливых без всякое боязни божое оказують с чого и кров невинъную людскую не встыдливе и невинее в надею заплаты за нее пенежное разливають и тым не менш пана бога ку гневу на реч посполитую побужають, уставуем если бы который шляхтич з зуфалъства з опилс-тва и без данья причины свовольне умысльне легце поважаючи право по-сполитое а паствечися над створеньем божим человека простого стану не шляхтича забил, а был бы пойман на горячом учинку в часе вышей в сем статуте на горячий учинок замероном, таковый шляхтич за слушным доводом маеть быти горлом каран кром головщизны. Вед же довод на шлях-
|
тича в такой речи не инакший быти маеть толко если его сторона жалобная при забитом з шестьми светками з людьми добрыми веры годными и неподойзреными сам семый поприсягнеть межи которыми шестьма свет-ки мають быти два шляхтичи веры годные и не подойзреные, тогды за таковым доводом тот шляхътичь маеть быти горлом каран. А если бы шлях-тичов ку доводу такому не мел, тогды кгды и простого стану с трема светками жалобник присягнеть, шляхтичь вжо толко головщизну платити винен будеть, нижли если бы тот шляхътич поведил иж бы с причины и за початком того забитого в обороне будучи до того примушон то учинил, и брал бы се в том ку отводу, тогды то ему маеть быти допущоно, а вед же тым обычаем маеть быти кгды само треть присягнеть з двема шляхтичами, а хотя бы и не шляхътою толко бы людьми веры годными и не подоз-реными, таковый маеть быти волен от горла и от головщизны. А где бы се то показало же тот шляхътич будучи и перед тым неспокойным свовольне то учинивши толко сам один брал се ку присязе без таковых светков, тогды то ему ити не маеть, але пред се за доводом зуполным стороны жалобное яко ест вышей описано маеть быти каран горлом, паклиж бы жалобная сторона не маючи зуполного доводу такого яко ся вышей поменило, але толко само втора або само третя того шляхтича поприсягнути хотела ме-нуючи быти иж се то на без людьи стало, тогды вжо пред се тот шляхтичь близжи будеть з своим доводом отъприсягнутися иж то не умысльне але примушоный у вобороне учинил, а естли бы теж и шляхтичь светков к присязе не мел, а толко сам присегнути хотел то вжо сторона жалуючая близшая будеть само треть з собе ровными толко людми добрыми и непо-дозреными при забитом иж не за початком его одно безъвинне забит присегнути, а тот шляхтичь обвиненый за таковым незуполным доводом горла не тратит, толко головщизну водле стану его заплатити будет повинен. А где бы теж шляхтичь таковый не был на горачом учынъку пойман, тогды пред се будучи потом до права водле сего статуту притягнен, маеть за доводом слушным за забитого головщину платити и шкоды которые бы ся в тот час стали так же за слушным доводом оправити.
Арт. 2. О мужобойстве межы людьмы простого стану. Теж уставуем, естли бы чоловек простого стану другого чоловека теж простого стану нешляхътича на смерть забил, тогды за доводом стороны жалучое при поступках правных в сем статуте описаных и за присегою стороны пово-довое само третего сторона обвиненая горлом карана, а головщизна з маетности его рухомое водле стану его заплачона быти маеть тому кому водле права належати будеть.
Арт. 3. О головщызных и навезках людей простого стану. Панъцер-ному слузе шестьдесят коп грошей, путному слузе пятьдесят коп грошей, бортнику сорок коп грошей. Тяглому человеку двадцать пять коп грошей. Челяднику домовому, отьчизному або полоненику двадцать коп грошей.
|
|
:
: