|
|
к собе не привлащали, и оповедати нам того недбалого врядника, в чыем бы ся то уряде деяло. Теж ревизоры мають доглядати, абы от мерников се-лидбы назначиваны были в третьем середнем поли; а где бы мерник того не вчинил, тогды сам ревизор мает назначити селидбы, а вряд мает с пиль-ностью примусити подданых селитися на местцах назначонных, чого тот же ревизор мает доглядати, и всих справ господарства врядового, естли слушне, а радне справуються; а нерадного и такового, который бы ся не водле уставы и росказанья нашого справовал, мает ревизор, под тоюж присягою, которою обовязан, винного не закрывати, але нам оповедати и довести того на него, а мы учиним с тым, что ся слушного нам повидит. Ревизор, где бы в ревизеи его помера еще не дошла, або непорадная была, мает мети до кождого двора одного слугу мерника, через которых померу справовати будет; а плату такому слузе на год по десяти коп грошей з скарбу нашого; а от померы знову, альбо перемеренья брати мают по десяти грошей с кождое волоки, а где бы только их поправляли, 2 грошы от волоки. А таковые мерники естли бы ся неслушне справовали и лениво для своего пожитку мерили, за то ревизор сам мает отповедати. Естли бы теж до колька дворов наших потреба мерников была, ино одного уставити и дати три волоки ему вольных от всих повинностей, к тому войтовство одно, а то учинити за нашим ведомом. А не иный хто обирати мает таковых мерников, одно ревизор. А где помера пойдет, мають мерити всякий кгрунт, купленым и заставный, кгдыж кмет и вся его маетность наша есть; а писати кгрунт, яко велики волоки вдолж и поперек и на которых местцах, и, естли бы с причины лихого грунту наддатки чинили, то мають при том же описывати. А где могут быти волоки прогоняные, ино там мерити в три поля, в кождое поле 11 моркгов, то есть у волоку 33 моркги з наддат-ком; а не могут ли быти прогоняные волоки с причин розных, ино моркго-вати. А где без земянских кгрунтов не выпростуються, таковые земли беручи, нашими кгрунты мають отдавати, где бы земяном споручь к их именьям, и ровно, яким кгрунтом возмут и колько, таким и также много отдати; а де бы ся ровный кгрунт на отмену не трафил, ино за волоку кгрунту преднего средним кгрунтом полторы волоки дати, а за волоку среднего кгрунту подлым две дати, как ся то учинит, а за волоку кгрунту преднего дати подлого кгрунту три волоки. А где наддаток подлым, боло-тливым, або песковатым кгрунтом прийдет в отмену давати, и то даем на пильное уваженье уряду нашого и ревизора и мерников, абы нам и тому, у кого беруть, шкода не была; для чого отмена абы не была давана без уряду. Але хто бы таковое отмены, за упором, приймовати не хотел, мають зостановити таковую отмену, уписавши до книг тогож уряду нашого, а вряд мает напоминати его о бранье отмены; на чом естли бы не перестал и, нам не обжаловавши, упорне стены волокам и границы казил, и в оный кгрунт в померу взятый вступовался: того вряд наш мает моцно боронити,
|
аьбо правом кгвалту на таковом поискивати. Ревизор и мерники мають и на то бачность мети, абы к прилеглым замком и двором села и всякие кгрунты наши прилучали, яко к которому двору ближей и споруч, а ведь-же так, ижбы ся можности и широкости тых врядов таковым перемене-ньем в подданых и в кгрунтех не зменьшивало. Тыеж ревизоры и мерники мают ся доведывати, посполу с урядом, от войтов и от лавников и подданых, о землях и всяких кгрунтех наших затаеных, або от кого-кольве за-браных, и то нам господарю доносити и оповедати, водле присяги и повинности своее.
Арт. 38. О доходах на уряд и о лежънех. Во всих замках и дворех наших, где земли на волоки вже розмерены, даем з ласки нашое господарс-кое на вряд наш: плат весь з десятое волоки, кром овса и сена третий сноп з гумен наших всякого збожья, торговое и померное все, и за лопатки пе-нязми дня торгового; десятая рыба при спущанью ставов; вина, коли который подданый на роботу не выйдеть грош 1 за день, а за другий день барана; записного от волоки пенезей 14, а где на нас овес отбирають ино от бочки по пенезю; вижованья грош, от присяги 2 грошы, пересуду — от копы грошей 3, децкованье и помилное слугам; куница за девкою и вдовою, коли до другое волости замуж идет, грошей 12, поколодного грош, з нив наших третій грош, за скаженье межы 12 грошей. Нижьли вряд наш за вины подданых, заруки, и ни за што иное, лежнев в домы, а ни теж по коледы ве-ликодные, и пожитки вымышленые и о скаженье меж въезджати, а ни всы-лати на суды не мает, чого ревизор пильне стеречи и боронити повинен.
Арт. 39. О судеревных лесех и пущах, и о бобрових гонех, и о бортех, сеножатех, и оступех и лесех розмереных. Есть некоторые лесы, пущы и дубровы наши, до которых з стародавна шляхта и подданые их уступы и входы мають, восполок с поддаными нашими; о таковых пущах и лесех вси врядники наши и их наместники мают ревизором ведомость чинити и сполне а пильне ся о том доведывати, хто за якою справедливостью и яко много служоб людей входы свои мают; и, выведавшы певне, яко много того кгрунту мають, о том справу давати нам, водле которое ведомости по великости и малости кгрунту нашого комисары зослати маем. А поколь комисары нашы на то выедут, мает уряд подданым росказати, уживати тых кгрунтов по первому, абы з держанья не были выпущоны, а пожиток до скарбу с того множити, ведьже, где бы спор шол о речь ровную, меньшую альбо мало болшую, нижьли о волоку, тогды таковые речи может вряд с ревизором альбо с померчим кончати и становити, не ждучи зосла-нья комисаров от нас, абы ся для так ровное речи в замкненью померы волок омешканье не сдеяло; а вряд, яко повинен, с пильностью мает дозрети, ижбыхмо шкоды в справедливости кгрунту нашого не мели. А лесы, на волоки розмереные, где годно, на пашню людми осажати и вольности мает давати уряд на пять альбо па шесть лет, аж и до десяти, а то мает быти
|
|
:
: