|
|
Арт. 23. Фолварки хочем мети, абы везде становлены были, а наболіли быти могуть при кождых замках и дворех нашых, окром где бы кгрун-ты злые и непожиточные были, и таковые казати людьми осажати, оставивши на вряд в кождом поли по одной волоце; а то вряд огородники и своим быдлом заробити мает, а к тому морг земли на огород, с чого личьбы чинити и платити не повинен.
Арт. 24. Уряд наш гумно в пильной опатрности мети мает, яко бы в нем ни в чом шкоды нам не было; а от збожья ужатья всякого мает мети на себе третий сноп, отдавши первей десятину и засеявши пашню нашу; а умолоту всякого збожья ревизорове наши у-во всих гумнах при дворах наших пробовати мают, и того догледати и научати, абы везде з выбоем и без опилку збожья молочены были. А продованье збожья гуменного мает быти на личьбе принято, по чом врядник положит, яко продавати; для того для всих подданых мають быти бочки торговые в местех, в дворех и гумнах наших, в селах и на всих гостинцах, однакое меры, по чотыри корцы краковских, которых корцов на тот час десять в полубочку Виленьском; и тою ж мерою продавати и засевати пашню з гумна, и такие бочки держати под клейном однаким. А в гумнех наших мает быти гуменник, подданый наш, в тойже волости оселый, чоловек добрый, справный, неподозреный, который на тую службу гуменную мает мети волоку, от цыншов и всяких иных платов, робот и повинностей вольную. А около засеванья пашни уряд мает пильность чинити, абы вси были засеваны; а где бы который за недбалостью не засеял, а либо теж пашню кому наймовал, а то бы ся слушне перед ревизором оказало, таковый мает дати с кождого моргу незасея-ного, або кому нанятого по десяти коп збожья, о чом с пильностью ревизорове мают ся доведывати от войтов, лавников и иньших подданых наших. Ведьже, где бы в котором году неврожай был, а так много, чим бы пашню засеяти, не нажал, мает о то по науку послати до подскарбьего нашого за — часу, и подскарбий мает ему казати старым збожьем засевати; а где бы не было, ино за пенязи цыншовые куповати альбо з иньшого двора прибавляти, абы ся тым николи пашни наши не зменьшивали. А з гумна нашого жыта в отсоп не давати, одно в леты голодные, и то алиж за нашим альбо подскарбьего нашого листом; а дати то на волю подданых, всхотят ли у копах, альбо молочоным жытом брати. Евьи теж, где бы вряд розумел быти не потребные, мает з гумна нашого выкинута, кгдыж на быдло и на стадо солома от збожья не з евьи молочоного пожиточнейшая есть; а где бы евьи мети была потреба, там поодаль от стодол и скирт у гумнех наших и подданых, для небезпечьности от огня, мають быти деланы. А на заробле-нье пашни на кождую волоку, абы было оставлено по семи волок оселых подданых наших, з волы и з клячами, поблиз двора и пашни, которые по два дни в тыждень служити мают, с чим уряд роскажет.
|
Арт. 25. О оборе быдла всякого и о рыкуньях. — При кождом фольварку нашом хочем мети дворничьки, то есть рыкуньи порадные, которым на рок за працу их з наших пенязей по две копе грошей мает быти давано от уряду, а три бочки жыта з гумна нашого и четвертая с третьего снопа врядничого на выхованье, для чого при кождом фольварку нашом мають ховати принамней до двадцати коров; а естли бы так много не было, ино з гуменных пенезей купити, колько может который двор выховати, и то перед ревизором оказати, и мает вряд в дозренью и доброй опатрности быдло дворное мети, а до скарбу нашого от коровы дойные не болын платити, только двадцать грошей, а от овцы старое за волну на рок один грош, а от молодое по полугрошку, а приплодки в рейстр писати и ведомости при личьбе чинити; а где дойные овцы и козы быти могут, мает с таковых ревизор плат становити, и уряд дворничок к тому принужати мает, абы и с того пожиток был, кгдыж то на многих местцах за добрым дозреньем быти может. А где бы колько у рыкуньи невест альбо девок была потреба, то ревизор постановити мает водле великости быдла, которым уряд с пенязей наших наем платити мает. А старое быдло, овцы и козы продаючи, пенязи до скарбу нашого отдавати, а згожое, звлаща поблизу, до кухни нашое отсы-лати; а которое быдля здохнет, ино за шкуру воловую пять грошей, за коровью 3 грошы, а с иньшого дробного быдла здохлого за шкуры не платити до скарбу; нижли с свиреп стадных шкур не продаючи, оказывати конюшому нашому дворному. А то все ревизорове мают в бачности мети и на местцу при пописыванью оборы в рейстры писати для того, абы не было забавенье при личьбе.
Арт. 26. Огороды дворные абы были везде розмерены, с которых вряд мает давати до скарбу с кождого моргу по 12 грошей; а с конопель дворных вже неповинно неводов робити; а естли бы огородных речей до кухни нашое потреба была, тогды то вряд мает отсылати, где будет роска-занье наше, а пенязми вже не будет повинен платити.
Арт. 28. Сена з дворных сеножатей на вряд наш даем пятый воз, также пятую стирту, альбо оборог, ровно кладучи наш и врядовый; але вряд мает с пильностью причинятися, абы сеножати дворные не залегали и за-рослые выправованы и в час покошены были; а где бы иначей, и нам бы в том шкода ся деяла, тогды вряд мает то нам нагородити з своего пятого воза, чого ревизор пильне дозрети мает.
Арт. 36. О ревизорех, мерниках и о номере водочной и о селидбах подданых. Ревизоры мают быти присяглые, люди добрые, сумненья побожного, оселые, а не голоты, в помере водочной и в господарьстве добре умелые, абы умели всего достаточне и справедливо выведати и указати пожиток наш врядови, в чом ся может причинити. Теж ревизор мает доглядати и с пильностью доведыватися, абы нихто з шляхты и подданых наших в пущах, на властных грунтех наших проробков не чинили и никак
|
|
:
: