|
|
даному допомогати. Вин наших ведомость мети и ревизором оповедати, и того стеречи, абы вряд вин и пересудов над уставу не брал; а естли бы за мовеньем его, вряд того не перестал, мает то войт ревизору оповедати. А войта вряду о всякую вину судити, только войтовства у него не отнимати, аж посполу з ревизором дознавши вину и неслушную справу его, и, того скинувши войта, иньшого уставити, мужа тоеж волости, неподозреного, на которого подданые зволят. Которые войтове и теж лавники по селам судов жадных судити, поклонов вымогати и вымыслов над поддаными чинити не мают, под виною до скарбу нашого, рублем грошей: одно, обачив-ши где — кольве шкоду нашу господарьскую, урядови або ревизору оповедати, ничого не закрываючи, под тоюж виною. А коли войтойство кому дають, присегати ему ненадобе, кгдыж вже вина на войта описана. А откупов уряд с подданых за роботу брати не мает; а где ж бы брал, войт мает то ревизору оповедати, под виною, копою грошей. А естли бы войт волоку пустую кому нанял, альбо от уряду нанятую перед ревизором утаил, тогды за то скарати его, яко злодея, горлом. А у войтовство кождому маеть быти придано волок сто, льбо больш, [альбо менш] водле прилеглости, хотя два и тры села и больш злучити. А для розознанья межи подданых, войт мает мети шнур однакое меры справленый и досветченый, и часу мокрого альбо сухого завжды его лихтовати и досветчати, и естли подданый один другому межу переорет и сказит, ино враднику на копу не ездити, [пересуду] и проезду не брати, але войт межу направит и возмет на том, хто ее сказил, на вряд дванадацать грошей, а собе за працу чотыри грошы. А вина битая, правом переведеная, — дванадцать грошей, а хотяб не переведена, и за об-жалованьем поєднана, — таковая ж вина. А естли бой станеться, а не жалуючи враду, поеднаются, тая вина шесть грошей, хто еднает, и объявити того врядови войт и лавники повинни под виною копою грошей.
Арт. 15. Цыншу з волоки сельское кгрунту доброго 21 грош, з серед-него — 12 грошей, с подлого — 8 грошей, а з вельми подлого, песковатого альбо болотистого, — 6 грошей; овса й волоки доброго и середнего кгрунту — по две бочки, а с подлого — одна бочка, а естли пенязми за овес казано будет давати, ино за кождую бочку — пять грошей, а за отвоз бочки ко-ждое — 5 же грошей; с тых же менованных кгрунтов, с кождое волоки сена воз один, альбо 3 грошы за сено а за отвоз 2 грошы, а з вельми подлого кгрунту сена и овса давати неповинни, нижли с кождое волоки всякого кгрунту мають давати: гусь, альбо полтора гроша, кур двое, або пенезей 16, яиц двадцать, або пенезей 4; на неводы грошей два, за стацыю грошей полтретья, а коли стацыю кажем брати, ино один раз в год за тые пенязи мають давати с тридцати волок яловицу одну, бараны два и с кождое волоки по куряти и по десяти яиц, а пенязей вже того году за стацыю не мають давати.
|
Арт. 16. Робота тяглым людем с кождое волоки по два дни на неделю, а толоки чотири лете, с чим скажуть, за што мает быти отпущона им робота о божьем нароженьи тыждень, о мясопустех тыждень, о великодни тыждень. А которых на роботу не надобе, ино их на осаде посадити, и будут давати с кождого кгрунту осады грошей 30, толок 12, або за толоки грошей дванадцать: а за кгвалты первоуставленые — жыта бочка альбо грошей 10; и вже такие осадники робити ничого не повинни, кром сена, розделивши на войтовства тяглые и осадные сеножати ровно, и то им зробити и в час спрятати. А з застенков тая повинность: где волока полная быти не может, ино от моркгу кгрунту доброго — грошей 3 и пенези 4, а з среднего моркгу — грошей 3, а с подлого — грошей 2, а з велми подлого — пол 2 гроша, а з волоки сеножатное, где могут быти дрова и пророб-ки, з сеножати добрые — 50 грошей, а з середние — 30 грошей, а с подлые — 20 грошей, а з велми подлые, болотливые або песковатые, — 15 грошей: А иж вже подданые нашы на тых платех и повинностях водочных суть осажены и постановлены, про то жадных стацый давати ани подни-манья чинити на послы наши и чужоземскіе не повинни.
Арт. 17. Огородники при дворех наших мають быти, даючи кождому по тры моркги земли, а им с того служити по одному дню в тыждень пешо, а жоны их лете не болш, одно шесть дней до жнива, альбо до полотья будуть повинни.
Арт. 20. Робота подданым через войта мает быти заказана дня недел-ного, с чим и на который день люди [волость] до роботы прийти мають; и войт тогож дня людем закажет роботу, и который чоловек не выйдет на роботу, ино за первый день огурного заплатит грош, а за другий день барана, а коли и в третий раз огурится або за пьянством не выйдет, ино бичем на лавце скарати, а дни повинные велети заробити. А ведьже, где бы з якое пригоды не мог подданый выйти на роботу, он мает через суседа, альбо лавника вряду оповедати, а вряд, порозумевши слушную причину, не мает его никоторою с тых виною казнити, а иньшого дня заробити ему повинное, што замешкал; а не откупатися от роботы никому.
Арт. 21. Пустых волок подданым не пахати, а который, не вписавшися в рейстр, смеет то вчинити, збожье до гумна нашого тратит и вины рубль грошей до скарбу нашого заплатит.
Арт. 22. А становитися к роботе подданым, як слонце всходит, а сойти з роботы, як слонцу заходити: А отпочивку тым, што з быдлом робят, перед обедом година, в полудню година, над вечером година; а которые пешо робят, тым отпочивку в тыеж часы, одно по полгодины мает быти; а то лете на великом дни отпочиненье. А хто рано на роботу не выйдет за огурством, таковый другого дня только часу, колько омешкал, заробити мает.
|
|
:
: